السلام عليكم ورحمة الله
الحقيقة لي فترة ودي اكتب موضوع عن البطاقات الائتمانية يتناول نقاط غير متداولة بكثرة، وراح أوجز قد ما اقدر لأني نفسي ما احب المواضيع الطويلة.
البطاقات الائتمانية استخدامنا لها غالبا ل 3 امور :
اما للسفر والشراء من المواقع اونلاين.
او لكسب النقاط.
او لشراء أشياء لا نملك مبلغها في الوقت الراهن فنقترضها من البطاقة ونسددها لاحقاً.
بس قبل ما أتكلم عن النقاط هذي يفضل ان تختار بطاقة من فئة ماستركارد وورلد او فيزا سغنتشر.
الفئتين هذي كانت في السابق حصرا لأصحاب الحسابات المميزة، اما الان فهي متاحة للكل في بعض البنوك (مثل بنك الجزيرة والرياض وسامبا) بشرط راتب اعلى من 7 الاف او شي زي كذا حسب البنك.
ميزة الفئتين هذي انك بخلاف النقاط والمكافئات راح تستفيد من مزايا الشركة الام نفسها من دخول صالات المطارات والتأمين الطبي و التأمين على السفر وخلافه.
اما بخصوص امريكان اكسبريس شخصياً ما انصح فيها عن تجربة.
بالنسبة للسفر والاونلاين:
ملاحظ لي فترة ان الناس صارت ما تستخدم بطاقاتها الائتمانية بالشراء اونلاين والسفر (الا بحالات بسيطة مثل استئجار السيارات) والباقي صار اعتماد كلي وثقة عمياء ببطاقة السفر من بنك الاستثمار، اختر العملة واشحن واشتر.
بالنسبة للدولار اتفق تماما بحكم ان سعر التحويل ثابت، اما بقية العملات ترى فيها عمولة ويخصمها البنك وقت التحويل والعمولة تختلف ليست ثابتة واحيانا تصل الى 2.2% ! فالمفترض تشوف سعر التحويل بقوقل وتقارنه بسعر تحويل البنك.
اذا حول 1% النسبة ممتازة، اذا حول 2% انا افضل انك تشتري بالبطاقة الائتمانية اللي معك، صحيح رسومها عالية 2.75% لكن في المقابل راح تستفيد مكافئات.
لأن المكافات لبطاقة السفر ضعيفة، بطاقة مدى لنفس البنك اعلى منها، بالمقابل البطاقات الائتمانية مكافاتها اعلى للشراء الدولي (يفضل التأكد من البنك، انا في البنك الأهلي ويعطي نقطتين للبلاتينوم و 2.5 نقطة للورلد ).
البعض في تويتر اقترح طريقة ماجربتها للامانة، يقولون اذا كنت تبي جنيه مصري على سبيل المثال، تأكد انه عندك بالمحفظة ولكن حول للدولار وليس الجني، العمولة بتكون اقل من التحويل للجنيه مباشرة، وهذي فيها ميزة اذا فاض عندك شي بترجعه للحساب الجاري من الدولار بدون رسوم.
بقية العملات بياخذ عليها البنك رسوم في الإضافة والاسترداد.
المكافات:
انا صراحة لي فترة امشي وانشر بهالثقافة، استخدم البطاقة الائتمانية بجميع مشترياتك، الكاش او بطاقة مدى ماله مردود عليك وانت كذا كذا دافع.
لكن انتبه لكذا نقطة: شوف بنك رسومه السنوية معقولة ونسبة مكافاته مجزية، أحيانا تكون مكافاتك 1000 ريال اخر السنة ورسوم البنك 800 ريال.
هنا تكون ما توفقت باختيار البطاقة، المكافات قليلة والرسوم عالية (ويفضل أيضا تعرف رغبتك بالمكافات سواء اميال او قسائم شرائية او كاش باك وتختار بناء عليها).
لا تــــســـدد الحـــد الأدنـــى (بعض البنوك تسميه المبلغ المستحق) سدد كامل مسحقاتك شهريا فور صدور الكشف الشهري ولا تشتري شي بالبطاقة الائتمانية ما تملك ثمنه بحسابك الجاري، استفد من المحافظ الالكترونية في كسب النقاط.
الاقتراض من البطاقات الائتمانية:
لشراء أشياء لا نملك ثمنها في الوقت الحالي: شخصيا اشوفه قرار غير صائب اطلاقاً! نسبة الفوائد عالية جداً وقد تصل الى 36% في السنة!!.
تسلف او حتى خذ قرض لكن لا تتدين من البطاقات الائتمانية فهي الأسوأ (ماعدى بطاقة تمكين من بنك البلاد، هي البطاقة الوحيدة على حد علمي اللي مافيها فوائد على المبالغ المتأخرة).
اخيراً، حاولت اذكر نقاط غير متداولة بكثرة واللي عنده معلومات أخرى في هذا الموضوع يشاركها ولكم جزيل الشكر.
