السلام عليكم ورحمة الله وبركاته
لاحظت الكثير يطلب من موقع العطور FragranceX او يستفسر كثير عن هذا الموقع، المهم انا طبعي قبل لا ادخل او اشتري من اي موقع لازم ابحث عن كل شي عنه: ( الامان، الثقة، الجودة، وتجارب الاخرين، الخ……)
بعد البحث و السؤال عن الموقع اكتشفت انه عبارة عن موقع Outlet، يعني العطور المعروضة في الموقع عبارة عن عطور مسترجعة من مستودعات بسبب تخزينها لفترة طويلة ولم يتم بيعها، والكثير تعرض لعوامل طبيعية كالحرارة او الرطوبة او سوء التخزين وافقدت جودتها، الدليل على هذا الكلام لو تبحث عن تجارب الناس راح تحصل البعض منهم يقول انه العطر اللي طلبه ريحته غير وما نفس الجودة اللي توقعها والريحة ما تثبت في الملابس.
طبعا ما نقول الكل، لانه البعض توفق في شراءه للعطور، يعني انت وحظك، البعض الاخر من العطور في الموقع حصل لها اخطاء في التركيبات اثناء عملية الإنتاج افقدت جودتها، طبعا العطور اصلية 100/100 في الموقع، بس مثل ما ذكرت قبل انها تعرضت للكثير من العوامل.
و الكلام اللي منتشر انه الموقع ياخذ العطور من الشركة بالنفس غير صحيح.
بيجي شخص ويقول انا متعود اشتريه منه والعطور كلها تمام التمام، طبعا مثل ما ذكرت انها مسألة حظ فقط، كذلك الكثير مثلك انت اشترى عطور من نفس الموقع وما كان بالجودة اللي يتوقعها.
نجي الآن من ناحية اراء الناس بالعالم عن هذا الموقع وندخل موقع trustpilot، هذا موقع معروف تكتب فيه اي موقع تريد تعرف نسبة الامان فيه و أراء الناس حول العالم ويطهر لك النتائج.
وهذه الصورة توضح نتائج البحث عن موقع العطور fragraceX
مثل ما واضح في الصورة الموقع حصل على نتيجة الثقة وهي 4 من 10 فقط، هذا اللي اريد اوضحه لكم واتمنى الموضوع يكون واضح ومفيد لكم جميعا
تقبلوا تحياتي لكم جميعا.
