تجربة شراء سيئة مع موقع etotalk

السلام عليكم ورحمة الله

اليوم باقولكم عن اسوء تجربة شراء مرة علي من اكثر من 8 سنوات

كنت ادور على galaxy note10 plus بس لان المعالج الي هنا ماش قررت اني اشتري الجهاز من برا

طبعا كنت باخذ الجهاز من الامارات من موقع mygsm بس المشكلة ما كان متوفر

وموقع وندا موبايل غالي والضريبة بتكون عالية

فبحثت ولقيت هذا الموقع المشؤوم

www.etotalk.com

قريت عنه وشفت اكثر من عضو قد شروا منه ويمدحونه

توكلنا على الله انا وخوي وشرينا الجوال في نفس اليوم

http://www.etotalk.com/p/samsung-gal…ck_p19020.html

خوي شراه ووصل له الجوال بعد اسبوع او اسبوعين بس لاحظت ان كرتونه يختلف عن الكرتون المعروف والجهاز حامي الشاشه الي يجي مركب عليه من المصنع رايح فيها.

انا شريت الجوال بس اخذت معه جراب وحامي شاشة (( دفعت زيادة 10 دولار ووالله اول ما شفتها رميتها ))

تحس انها ابو نص ريال جودتها ابو كلب

تم طلب الجهاز في تاريخ 2020/5/22 والدفع كان عن طريق الباي بال

تكلفة الجهاز مع الشحن كان ب 833 دولار

وطبعا كان وقت ازمة كورونا وصار لي مشاكل انه لازم ارسل ل dhl الجواز علشان يتاكدون وحاله

المهم تم شحن الجهاز ف 6/1 واستلمت الجهاز يوم 6/9

المفاجاة الي صارت لي يوم فتحت الجوال

اول شيء طلع الجوال مستعمل اكثر من 9 شهور والكرتون رايح فيها

وفوق هذا كله المعالج موب معالج سناب دراقون الي انا طالبه مرسلين لي الجهاز بمعالج اكسينوس

حتى البطارية المفروض يكون صحتها 100% يوم شيكت الا طلعت 95%

ومن هنا بدات رحلة المعاناة، طبعا انا علو طول راسلت الموقع وارسلت لهم ملف كامل اثبت لهم ان الجهاز مستعمل

وكان ردهم علي اربع كلام فقط الجهاز جديد وليس مستعمل يعني كذاب انا ولا وش ؟؟

طبعا وبعد عشارات الايميلات صاروا ما يردون علي ((هم اصلا من قبل ما يردون عليك الى بعد 24 ساعه))

طبعا انا هنا دخلت الباي بال علشان ارفع دعوى عليه

والي ضحكت منه اني لما جيت ارفع هم كاتبين انك اذا كان عند مشكلة لا ترفع دعوى وتواصل معنا لان ((رفع الدعوى بس بيطول مدة الحل ))

انا هنا قلت اخر مرة بارسل لهم واشوف ارسلت لهم رسالة تهديد وانكم اذا ما رديتو علي بارفع عليكم في الباي بال

وانا ما ابي منكم الا تشحنون لي جهاز ثاني وارسلو لي بولصية شحن علشان ارجع لكم جهازكم

ردوهم والله يا كان مستفز بشكل غير طبيعي (( اذا تبي ترجع الجهاز بنخصم من قيمته 15% (( تقريبا 450 ريال )) وفوق هذا انت الي بتتحمل الشحن ))

قلت هين نشوف واروح الباي بال وارفع عليهم دعوى وملف كامل اثبت لهم ان الجهاز مستعمل وليس جديد

رفعت الدعوة يوم 6/18 يعني بعد اكثر من اسبوع من يوم استلمت الجهاز

والباي بال يعطي مهله للبائع 20 يوم حتى يرد عليها

اسوء شيء انهم كانوا عارفين انهم غلطانين ويخلونك تنتظر المدة كاملة 20 يوم علشان يمرمطونك بس

والحمد لله بعد اكثر من شهر الباي بال ارسلوا لي هذي

في نفس الوقت ارسلت لهم ارسلو لي بولصية شحن علشان ارجع جوالكم ردو علي بعدها على طول وقالوا ابشر 48 ساعه وتوصلك

رديت عليهم مثل تعاملكم معي من البداية انا باعاملكم بنفس الطريقه

يمكن بعد سنه او سنتين بارسل لكم جهازكم

ردو علي على طول بهذي

قلت ان شاء الله في 2021 او 2022 بيوصلكم

النهاية:

الخلاصة:

الموقع يمكن تجربتي معاه كانت سيئه ويمكن بعضكم كانت لهم تجارب ناجحه مثل خويي

لانها في النهاية سلعه يمكن توصلك تمام ويمكن لا

بس الشيء المشترك الي مستحيل يتغير ويكون نفسه لجميع الناس هو خدمه العملاء

والله لو فيه اقل من الصفر لاعطيهم

يعني ما ادري وش اقول والله

واذا شريت منه وطلع لك مشكله في الجهاز لا تتوقع ابدا انهم بيخدمونك او بيحلون مشكلتك

ونصحيه اخيرا

اي موقع جديد تجربة نصحيه نصحيه نصيحه لا تدفع فيه الا ب الباي بال واذا مافيه اههههههههرب

وحتى لو الموقع يطلب رسوم اضافية ل الدفع ب الباي بال ادفع وانت مغمض

وبس والله هذي كانت تجربتي معاه والسلام عليكم

تحديث:

طلع ان الباي بال فصل فيها لصالحي بدون ارجاع السلعة

يعني الجوال مني مطالب اني ارجعه لهم

ونصيحه والله

اذا اصابتك اي مصيبة قول ( لاحول ولا قوة الا بالله انا لله وانا اليه راجعون اللهم اجرني في مصيبتي واخلف لي خيرا منها )

والله لتشوف كيف تنحل بدون ما تدري وربي بيخلف لك خيرا منها مثل الي صار لي بالضبط

ثبت عن النبي ﷺ أنه قال: ما من عبد يصاب بمصيبة فيقول: إنا لله وإنا إليه راجعون، اللهم آجرني في مصيبتي، وأخلف لي خيرًا منها؛ إلا آجره الله في مصيبته، وأخلف له خيرًا منها.