﷽
السلام عليكم
شباب كثرت الاسئلة و الاستفسارات عن سبب رفض ابل و سبب قبولهم و الناس ماينلامون
يطلبون مع بعض نصهم ينقبل و نصهم ينرفض و بالعلم انهم كلهم طلبوا بنفس الطريقة ويبدون يشككون في طريقة طلبهم.
اعرف ان الاغلبية تعرف ما سأقول و لكن موضوعي موجة للي ماعرف الطريقة فالضبط و احتماليات القبول.
اولا تقدر تطلب على اي شخص في امريكا وهو يعيد توجية الجهاز لك في بلدك
او الي عنوانك في امريكا (شركات اعادة التوجية) وهذي الطريقة مضمونه 100٪ لكن مشكلتها الضرايب و التاخير و دفع زيادة على الشحن (تشحن مرتين الاولى لخويك و الثانية خويك يحوله لك).
اذا يبقى الطريقة الرسمية الي هي عنوان الموضوع
1- يكون عندك عنوان داخل امريكا من احدى شركات اعادة التوجية.
مثال : ارامكس – ستاكري – فيش فاست – ايزي شوب- وارلد شوب – شيب ستور ..الخ
اي شركة تعطيك عنوان داخل امريكا مو ضروري الي انا ذكرت لان اكو شركات ما اعرفهم
و كلهم نفس الشي بطريقة استلام من ابل منهم و لكن انتبه للي بضرايب او بدون ضرايب و الي خدماتهم زينة.
2- بطاقة إئتمانية حقيقية (فيزا كارد – ماستر كارد) من اي بلد عادي (عربية – اوروبية امريكية اياً كان مصدرها).
3- ادخل موقع ابل الرسمي apple.com وحدد المنتج الي تبي و اشتره طبيعي جدا وكأنك في الامازون.
بعد ماتتم العملية بيدزولك ايميل معالجة الطلب ((اهني القشة التي قصمت ظهر البعير)).
اثناء معالجة طلبك يعني طلبك سيقع تحت يد موظف مختص في طلبات الاون لاين وانت
امام احد الخيارين اما ان يمرر طلبك و يحوله من Processing ((معالجة)) الى Preparing to Ship
((تجهيزة للشحن)) وستفرح بقبول طلبك وتشتغل ايميلاتهم عليك بالاوقات المتوقعة
للاستلام و استقطاع المبلغ من بطاقتك الائتمانية وتستانس وتسولف بالدواوين ومحد قدك.
والخيار الثاني ان يكون موظف اخر و اقشر بيستقبل طلبك هو نفسه رفيجي مال طلباتي انا الي كل مرة ينطرني ومعاه عصه.
وعلى طول يقوم في الغاء الطلب و يبعث لك ايميل مبهم يقولك عنوانك اعادة
توجية وتم الغاء طلبك او يقولك فيزتك من بوركينا فاسو ماتمشي او ممكن يبالغ فالكذب و يقولك انت الي الغيت الفاتورة (حصلت معي).
وممكن يعطيك فرصة بعد (حصلت معي اكثر من مرة) يطلب منك تغيير العنوان وتغيير
العنوان اعرف انك ان حطيت اي عنوان اعادة توجية ماراح يقبل يعني رفض برضوا لانه مهما عملت انت مرفوض.
اذا انت عملت الثلاث نقاط الاولى ترا انت عملت الي عليك وجميع الي تم قبولهم ماعملوا اكثر من هذا فقط عامل الحظ الي اسعفهم مع موظف سمح.
يقولك واحد لالالا جرب ستاكري انا قبلوني ولا الثاني لالا ماعليك منه شوف التتبع
مالي على فيش از فاست، ترا اثنينهم صح و اثنينهم ماسوو شي زيادة عن الثلاث نقاط الي ذكرت!!
لا تحدد انها شركة اعادة توجية او غير بدال الاحرف حط و ماحط كله كلام فاضي، حط عنوانك كما هو وفقط اللتزم في الثلاث نقاط المذكورة فوق.
عدد محاولاتي للايفون 15 برو 15 محاولة اول 5 محاولات منهم نفس العنوان و الفيزا
حتى وصلت لمرحلة يطلعلي بلغت الحد الاعلى مايصير تطلب ايفون وبالعلم ان كل المعاملات رفض.
و اشوف الشباب ربعي فالدوانية يقبلونهم احتر؟؟؟؟ انتو شنو سويتوا انصدم و اروح و اغير
العناوين طلبت على ثلاث عناوين مختلفين و غيرت الاكاونت (الابل اي دي) و نفس الشي
رفض و غيرت الفيزا و حطيت فيزا امريكية وبرضوا رفض وفتحت عناوين اعادة توجية جديدة
بأسماء ربعي في امريكا و برضوا رفض ماذخرت شي عملت ال علي و زيادة و برضوا رفض.
رديت على طريقتي الاولية العنوان و الفيزا نفسهم و طلبت سير للساعة قبلوه و طلبت
الشاحن الي يشحن الساعة و التليفون و قبلوه و طلبت كفر للايفون وقبلوه جربت ايفون 15
ميني مع صاحبي وعجبني مقاسة و حجمه و سرعته وقلت الحمدلله انهم ماقبلوا كل
طلباتي للايفون 12 برو علها خيره لي بجرب على الايفون 12 ميني (رغم ان سعره فالكويت ارخص من سعره في المتجر الامريكي ترا بسبب الشحن فقط ).
بس فيني حرة على ابل و بجرب وعملت العملية والله اني مو متأكد اي رقم هالعملية
لكن اعتقد والله اعلم انها محاولة رقم 16 اول ماطقيت شراء على طول بلمح البصر
استقطعوا فلوسهم 779 دولار و اخذتلي دقيقة صمت افكر هم اشلون اقبلوا و ليه
قبل رفضوا وبالعلم اني اعرف اسباب القبول و الرفض و ذكرتها فوق لكن من صدمت
القبول بس قلت للحين ماصارت Preparing to Ship بالعلم انهم قصوا فلوسهم وكل
المحاولات السابقة الـ15 ماكانوا يقصون شي وبرضوا مشكك في القبول.
الاستلام اليوم على ستاكري (عنوان اعادة توجية) و البطاقة الاتمانية كويتية.
فقط طبق الثلاث نقاط و كرر المحاولات ولا تغيير عنوانك او بطاقتك البنكية وان شاء الله انه يكون شرح كافي ووافي.
وهذه طلباتي من ابل على مر سنة نفس البطاقة و العنوان و الحساب الخاص لي في ابل.
الدائرة الخضراء القبول
الدائرة الحمراء رفض
الدائرة الزرقاء انا الي اللغيت
ملاحظة:
بعض الطلبات المرفوضة موموجودة فالصفحة (طلبت ايباد برو و تم رفضة و طلبت سمارت كفر كيبورد عربي و ايضا تم رفضة وماحصلتهم بالصفحة)
