بسم الله الرحمن الرحيم
السلام عليكم ورحمة الله وبركاته
حبيت اشارك تعديلاتي الكاملة للسيارة من تاريخ شرائي لها في بداية السنة الميلادية حتى هذه اللحظة
مشاركتي للتجربة للي حاب يركب اي شيء على سيارته او ماخذ ستاندر اقل فئة مثلي ويبي مواصفات ولو شي بسيط والروابط آخر الموضوع
سيارتي كيا سيراتو 2020، وبحكم ان لي تجارب سابقة عديدة مع التعديلات والاضافات البسيطة على سيارتي السابقة
كان الموضوع بسيط جدًا ولم اكن متخوفًا من اي شيء، سألت الوكيل بالبداية عن الضمان واخبرني ان اي اضافة كهربائية تسقط ضمان الكهرباء فقط
وبما ان السيارة من 2019 وهي بنفس الشكل ومافيه احد اشتكى من مشاكل الكهرب نهائيًا توكلت على الله وبديت بالتعديل
بالبداية ركبت داش كام.
بعد موضوع الداش كام لاحظت ان المسجل سيء بالبلوتوث لدرجة اني احيانًا لازم اقفل تطبيق الصوتيات اكثر من مرة عشان يضبط
واذا كنت فاتح قوقل ماب على سبيل المثال ويبي يعطيني توجيهات صوتية يجي الصوت متأخر ورايح نصه
مثلًا بدل من ان اسمع (على بعد 600 متر الاتجاه نحو المخرج الى اليمين) اصير اسمع (نحو المخرج الى اليمين)
وبعد البحث اتضح انه مسجل رديء الصنع من تركيب الوكيل نفسه وليس من المصنع
وقررت آخذ شاشة اندرويد وقلت دامني باخذ شاشة خلني آخذ معها كاميرا خلفية وبحكم تجربة سابقة
قلت خلني آخذ شي يستاهل لو ادفع 2000 ماهي مشكلة بس ابي شي مايغثني
وكان شرطي الاساسي ان المظهر يكون مطابق لشاشة الوكالة، ولقيت 3 اشكال، الاول نفس الوكالة والثاني لمس كامل والثالث لمس مع فرار تحكم بالصوت، استبعدت الاثنين واخذت اللي نفس الوكالة.
واخذت معها كاميرا خلفية بزاوية عريضة 170 درجة وعدسة عين السمكة لرؤية اوسع، لكن الشكل كان غبي شوي للامانة وفيه انواع ثانية بنفس المواصفات لكن افضل كشكل وناوي اغيرها قريب.
لكن للاسف الشاشة ماتدعم منافذ الوكالة الUSB والAUX، لكن ماكنت محتاجهم بذيك الفترة
وبعد فترة قصيرة احتجت اني اشغل نظام ابل كار بلاي واخذت قطعة اضافية اخرى مخصصة لشاشات الاندرويد تعطيك ابل كار بلاي
جربته بالبداية وكان يعلق احيانًا ويطلعني وبعد تغيير السلك اشتغل معي بسلاسة وبدون مشاكل تماماً
وبما ان الشاشة ماتدعم USB الوكالة طلعت اسلاكها من الدرج المقابل للراكب، وبعد ما صرت استخدم الابل كار بلاي صرت احتاج مدخل USB
وطلبت وصلة تمديد للمنافذ واستغنيت عن ولاعة الدخان
بالنسبة للشاشة اخذت نسخة الـ4 قيقا رام مع 32 قيقا ذاكرة داخلية، والمعالج كان ثمان انوية
ومن الاشياء اللي افتقدتها ايضًا هي لمبات الشماسات، مكانها محفور وموجود لكنها غير موجودة
وبعد البحث وجدتها بسعر رخيص لا يتجاوز 100 ريال للطقم وتوكلت على الله وطلبتهم وقصيت المكان وسويت لهم ظفيرة مخصصة وركبتهم بدون اي مشاكل
مع العلم انه يوجد ظفيرة جاهزة وطلبتها وتكنسل الطلب وقلت لعلها خيرة وسعرها كان بسيط تقريبًا 40 ريال لكن الحمدلله
وبعد فترة قصيرة رجع علي شخص وصدمني وخربت لمبة الفلشر الامامية ووقتها المحلات مقفلة بحكم حظر التجول وقلت مالها الا علي اكسبرس
ودخلت وطلبت لي فلشرات LED امامية طقم وجابوه لي ارامكس لين البيت ولله الحمد
نوره اقوى من الهالوجين لكن ماهو بالقوة اللي تعمي ومايسبب مشكلة الهايبر فلاش (يدق بسرعة)
وجربت اشغله مدة ربع ساعة وظل نفس ماهو ولله الحمد،
وبنفس الفترة ايضًا كنت محتاج انارة افضل بحكم ان دوامي 40 كيلو رايح ومثلها راجع واحيانًا ارجع بالليل وقلت ابغى زنون
وبعد البحث والتقصّي عرفت ان الكوري كهربه يحتاج مانع ذبذبة ماينفع له اي زنون وطلبت محولات فيها خاصية منع الذبذبة CANBUS
مع لمبات موجودة عندي من قبل واذا ماني غلطان نوعها HeartRay ولونها 5500K
واخذت معها لمبات ليد للسكن خطين عشان السكن والنور النهاري بنفس اللمبة واللون قريب للزنون بحيث يطلع الشكل متناسق
وقلت ايضًا دامني عدلت كل هالاشياء خلني اغير انوار الداخلية واقلبها LED وليتني ماسويتها لأن النوع اللي اخذته انارته قوية وتعمي صراحة
وغيرت انوار السقف في الامام والخلف وانوار الشماسيات الى LED وهذي صورة للامامية والخلفية
وهذي لأنوار الشماسات
وطبعًا مانسيت الشنطة لازم نور قوي عشان اشوف الاشياء داخل الشنطة بدون مااشغل فلاش الجوال
وطبعًا لما وصلت عند اللوحات قلت خلني اكسر الروتين واركب لها نور برتقالي قريب لدرجة الهالوجين بس اقوى
وفعلًا طلع الشكل جدًا ممتاز
جميع القطع المذكورة بالموضوع قمت بتركيبها انا شخصيًا بيدي دون اللجوء لأي فني
وبدون تجريح اي اسلاك باستثناء الكاميرا الخلفية جرحت سلك الريوس بقطعة خاصة لتجنب اي التماسات او مشاكل كهربائية لا قدّر الله
جميع القطع تعمل بكفاءة عالية حتى تاريخ كتابتي لهذا الموضوع واقل قطعة اكملت 4 اشهر باستثناء تمديدة الUSB قبل فترة بسيطة جدًا
واكثر شي تعبني هو طريقة تفكيك الديكورات بحكم ان السيارة جديدة ولا يوجد مخطط ولا شروحات كافية لطريقة التركيب لكن تجاوزت هذا العائق
بدون تكسير اي ديكورات او كلبسات ولله الحمد والمنة، وكون السيارة جديدة ولم تتعرض للشمس ساعدني كثيرًا في عدم حدوث مشاكل اثناء الفك
اما الآن نأتي للاسعار والروابط، الاسعار اللي راح اكتبها هي اسعار القطع وقت الشراء وليس في الوقت الحالي
والاسعار تم تقريبها لأقرب عدد صحيح بدون فواصل لسرعة الكتابة
الشاشة 325$
https://www.aliexpress.com/item/4000109738804.html?spm=a2g0s.9042311.0.0.27424c4dFrKuTz
الكاميرا من نفس البائع 20$
https://www.aliexpress.com/item/32971440497.html?spm=a2g0s.9042311.0.0.27424c4d5N33Wk
محولات الزنون 57$
https://www.aliexpress.com/item/32842986724.html?spm=a2g0s.9042311.0.0.27424c4d74AEtF
لمبات الزنون 26$
https://www.aliexpress.com/item/32907259867.html?spm=a2g0s.9042311.0.0.27424c4d74AEtF
قطعة ابل كار بلاي 31$ “غير متوفرة للاسف”
https://www.aliexpress.com/item/33010344231.html?spm=a2g0s.9042311.0.0.27424c4dRmMNEI
تمديدة اسلاك الUSB بـ6$
https://www.aliexpress.com/item/4001062271303.html?spm=a2g0s.9042311.0.0.27424c4dlUejpy
انوار الشماسات 12$
https://www.aliexpress.com/item/33011768032.html?spm=a2g0s.9042311.0.0.27424c4do0s1Yu
ظفيرة انوار الشماسات للي يبيها 9$
https://www.aliexpress.com/item/4000326653783.html?spm=a2g0s.9042311.0.0.27424c4do0s1Yu
انوار اللوحة 2$
https://www.aliexpress.com/item/32859595061.html?spm=a2g0s.9042311.0.0.27424c4dkMSYop
انوار الفلشر 11$
https://www.aliexpress.com/item/33007807761.html?spm=a2g0s.9042311.0.0.27424c4dkMSYop
ليد الشماسات والداخلية والشنطة بمقاسين مختلفين اجمالي السعر 32$
https://www.amazon.com/gp/product/B0821GVXB3/ref=ppx_yo_dt_b_asin_title_o04_s00?ie=UTF8&psc=1
https://www.amazon.com/gp/product/B0825Z69ZP/ref=ppx_yo_dt_b_asin_title_o04_s00?ie=UTF8&psc=1
ليد السكن 12$
https://www.amazon.com/gp/product/B07333R1HC/ref=ppx_yo_dt_b_asin_title_o04_s00?ie=UTF8&psc=1
والسلام عليكم ورحمة الله وبركاته.
